أنا نْمُوتْ عَالتَّعْنِيقْ

اليوم العالمي للتعنيق… زعمة اخترعوا هالنهار وقتلّي الخوانجية أطلقوا علينا جماعة عنّقني ردّا على شعارنا أعتقني :- شويّة ذكريات
المهم… أنا نموت عالتعنيق… نقوم الصباح نعنّق الدنيا… نعنّق الشمس كي تطلع… نعنّق الموجة وجبل بوڨـرنين… نعنّق قهوتي العربي… نعنّق بابا وأمّي… ونعنقّكم فردا فردا كي نصبّح عليكم ونخرّفلكم عالأمل… ونعنّق الشوارع… ونعنّق الغزرة الهاربة والوجوه التاعبة… ونعنّق الناس إلّي ما نعرفهمش كي يوقّفوني … ونعنّق الناس إلّي تخدم معايا قبل البروفة وبعد البروفة وفي وسط البروفة… ونعنّق الناس المحلاهم إلّي يعملوا ورشة المسرح في « سيني فُوقْ »… ونعنّق الصغار الكل إلّي يجيو في ثنيّتي… ونعنّق مرى كبيرة تعرضني ديما وتدعي يراها ضاوية وراك وقدّامك… نعنّق صوحابي… نعنّق فيولتي
Pour ceux qui ne le savent pas je collectionne les éléphants
ونعنّق كتبّتي… ونعنّق وجيعتي ودموعي… نعنّق حروفي… نعنّق أحلامي إلّي ما تحققوش… نعنّق حياتي… نعنّق كل يوم تونس ألف مرّة قبل ما تجي الموت تعنّقني تعنيقة ليكم الكل

الفنانة ليلى طوبال